KINANTI
156
Kieu eta anu tujuh
Hartina sahiji-hiji
Mimitina mah qodiran
Hartina kawasa gusti
Muridan keresa allah
Aliman uninga gusti
157
Hayan the artina hirup
Nya eta hirupna Gusti
Sami’an ngadanguna Allah
Bashiran Allah ningali
Katujuh Mutakaliman
Allah nu ngandika deui
158
Sabab eta anu tujuh
Aya nyatana di diri
Aya di badan sapata
Mun manggih tangtu hasil
Kabuka hijabna Allah
Kabingung tos tangtos leungit
159
Malah-malah rai lamun
Kapanggih nu tujuh tadi
Sifat-sifatna kapendak
Dina sakujuring diri
Tapi sanggeusna kapendak
Tarekatna pek pilari
160
Mun tarekatna kasusul
Tanwande ma’rifat jati
Kana datna Gusti Allah
Nu caang sajero ati
Carek babasan jawa mah
Teangan sajero dikir
161
Nu kaya dilah gumantung
Kaya sarangenge bijil
Gumantung tanpa cantelan
Kitu ceuk babasan jawi
Tatapi lamun kapendak
Jasmani tangtuna sepi
162
Rasa moal boga wujud
Kagenten ku warna rupi
Nya eta nu tadi tea
Nu kaya srangenge bijil
Kaya lintang karahinan
Jeung kaya emas sinangling
163
Rai lamun enggeus kitu
Kakara tangtu mangarti
Kana napi sareng isbat
Karasa sareng kapikir
Lamun teu acan kapendak
Kumaha bisana harti
164
Malah dalil antal maotu
Qoblal maotu kapanggih
Hartina bisa karasa
Paeh samemehna mati
Raina lajeng ngajawab
Rada keder pikir rai
165
Aya paeh memeh pupus
Naonana atuh anu mati
Lamun nyawana anu wapat
Atuh moal balik deui
Gumelar deui ka dunya
Rai weleh henteu ngarti
166
Ceuk raka kade kaliru
Sanes nyawana nu mati
Sategesna rasa nyawa
Nu paeh sama sakali
Ari rasa nyawa eta
Sategesna napsu dhohir
167
Dina eukeur waktu kitu
Teu inget anak rabi
Sumawon ka harta banda
Diri ge teu kapieling
Wungkul cengeng ka Dat Allah
Ninggal ku sajero ati
168
Kitu rai mun teu maphum
Eta anu saperkawis
Nu kadua perkawisna
Kudu ngarasakeun misti
Dina nyerina sakarat
Jalan paeh ke di ahir
169
Geuning ceuk basa karuhun
Ka anakna ngeweweling
He barudak kudu bisa
Nganjang ka pageto misti
Supaya maneh waluya
Sangkan lampah ati-ati
170
Geura pek ku rai emut
Eta saur sepuh tadi
Nu bener kabina-bina
Geuning ayeuna kapaggih
Bet aya dina hadisna
Babandingan basa tadi
171
Nyaeta antal maotu
Jeung qoblal maotu deui
Kapan teu beda maksudna
Kudu paeh memeh mati
Singhoreng sangkan boga
Kasieun engke di ahir
172
Lamun geus ngarasa pupus
Sasat geus ngarasa nyeri
Ngarasa rasa sakarat
Piraku rek liwar teuing
Ngajujur laku maksiat
Da aya kasieun pasti
